Sali zäme

Ich ha scho bi es paar Anlässe mitgemacht, bin selber aber nonig eso lang debi. Bis jetzt han ich es immer guet preicht und es überall sehr schön gha.

Aber ich han au gemerkt dur vieli Gspröch, dass rächt viel Lüüt privat würklich niemert hend, kei Familie oder au e kei richtigi Fründe. Das cha ganz unterschiedliche Gründ ha. Ich kenne das au, und die wenigste Lüüt getraued sich das z' säge. Ich weiss wie es isch, wenn niemert do isch wenn es eim würklich emol seelisch ned guet goht und me gern würde rede, oder wie es sich anfühlt, wenn eim d' Decki dehei fascht uf e Chopf gheit. Hütt hett öpper zu mir gseit, me wett jo nur mit öpperem d' Erlebnis teile, echli Zyt verbringe. Nun, für das isch jo die App do. Aber vielleicht cha me au im ganz Chlyne aafange: Zäme guetsle, es Kaffi trinke, im Garte jäten, zäme puzzle, zäme Fernseh luege, zäme choche, en Chaschte usemischte usw....echli Alltagssache wo nüd choschte und me einewäg macht. Mini Idee isch, dass me sich sälber wöchentlich und regelmässig zunere bestimmte Zyt zur Verfügung stellt, für Anderi do zsy...zum Beispiel amene freie Nomittag, 2-3  Std. länget.  Grad ebe die Lüt wo wüsse, wie sich dunkle Stunde und Einsamkeit anfühled. Me darf sich det melde, rede, oder au nur telefoniere, Skype... trifft sich viellicht, isst zäme Znacht...  und - das isch mir wichtig: Me muess ned topp zwäg sy. Me tuet ned diskutiere bis id Tüüfi abe sondern echli Alltag teile. 

Ned fix immer zum  vorus abgemacht sondern ganz spontan, wenn me grad kolleret oder s' Wetter so bombastisch isch, dass es grad dernoh schreit öppis z' undernäh.

Ich wett e Gruppe mache mit nur maximal 8 Lüüt inklusive mir. Dänkt wär au, dass me euisi Geburtstäg tüend fiere und gwüsse Alässe tüend pflege, z Bsp. Samichlaushöck. Ich würde Euich gern ilade und das denn zäme bespräche, wer wenn Zyt hett und was me wenn chönnted mache alle zäme i de Gruppe, wir hüüfig usw... .

Also eigentlich en Art Clique gründe. De Name chömmer Euis jo zäme uusdänke;-)). Das Ganzi lauft denn nachher nüme über die App do ab.

Ja klar, wenn eim d' Lüüt ned passed cha me au wieder goh. Nur vergässed ned, mängi Lüüt chönd ihres Herz erscht zeige wenn sie eim echli besser känned.

Es isch mir wichtig, dass ned gschnödet wird über Anderi. Mir begägned einander mit Respekt und löhnd enand läbe. Und jede wo mitmacht, stellt sich als Gägeleistig au zur Verfügung für "ume z ' sy und Zyt z' ha."

Es isch emol en Versuech.... mir gründe quasi üsi eigeni Family! Mir alte Haase,

(ich bin 53 J alt) wo d' Chind langsam uusflüge, oder arbeitslos sind, oder pensioniert sind, oder nur immer am Schaffe sind... wie au immer.

Ich bin gspannt, öb s' Bedürnis überhaupt do isch oder ned. Wenn ned- au schön!!!

Ich wohne im Aargau Freiamt. Dänked dra dass Ihr allenfalls au bereit sy müend, echli wieters z' fahre je nach dem.

Schön hesch durch ghebet mit Läse, danke. Melde Dich doch wenn s' Dich anspricht. Lass Euis emol träffe und kännelerne  imene Restaurant und emol drüber rede.

Liebe Grüess a alli Nanda

NEUE INFORMATION:

Damit auch Ungeimpfte teilnehmen können, findet das erste Treffen zu einem  späteren Datum statt.  Zudem treffen wir uns nicht in einem Restaurant,  sondern im privaten Rahmen. Der genaue Termin und Ort gebe ich gern bei der Anmeldungen bekannt.

Herzensgruss Nanda